როგორ უნდა მოხდეს სადეზინფექციო ხსნარის სწორად გამოყენება და რატომ არის მნიშვნელოვანი ქვემოთ ჩამოთვლილი თითოეული რეკომენდაცია?

• გაწმინდეთ ზედაპირი დეზინფექციამდე;
• დაიცავით კონტაქტის დრო;
• შეამოწმეთ ზედაპირის თავსებადობა;
• დარწმუნდით, რომ ხსნარი გაზავებულია სწორად;
• გამოიყენეთ დამცავი ხელთათმანები.

   პანდემიის პირობებში, დეზინფექციას გადამწყვეტი და უმნიშვნელოვანესი როლი უჭირავს  ჩვენს  ყოველდღიურ ცხოვრებაში, რადგან ეს უზრუნველყოფს ჩვენს უსაფრთხოებას. თუმცა, ძალიან ხშირად ჩვენ ვხედავთ, რომ სადეზინფექციო ხსნარები გამოიყენება არასწორად, ამიტომ, მოგიმზადეთ სტატია, სადაც  გაეცნობით, თუ როგორ უნდა მოახდინოთ ზედაპირების სწორი და ხარისხიანი დეზინფექცია, რათა მიიღოთ ეფექტური შედეგი და მაქსიმალურად დაიცვათ თავი ვირუსებისგან.

 

1. ზედაპირის გაწმენდა დეზინფექციამდე.

   დეზინფექცია არის პროცესი, რომელიც ანადგურებს დაავადების გამომწვევ მიკრობებს, რომლებიც რჩება ზედაპირებზე. სადეზინფექციო ხსნარმა, ჭუჭყსა და ნარჩენებს შორის შესაძლოა კარგად ვერ შეაღწიოს, სწორედ ამიტომ, ზედაპირის საფუძვლიანი გაწმენდა დეზინფექციის წინ, უზრუნველყოფს იმას, რომ მიკრობები არ დაიმალოს სადეზინფექციო საშუალების გამოყენებისას და მოხდეს მათი სრულად განადგურება.

2. კონტაქტის დრო.

   ნებისმიერი სადეზინფექციო საშუალების გამოყენებამდე, აუცილებელია წავიკითხოთ მის ეტიკეტზე დატანილი ინფორმაცია, სადაც მითითებულია ხსნარის ეფექტურად მოქმედებისთვის საჭირო კონტაქტის დრო სხვადასხვა ტიპის ზედაპირისთვის. მაგალითად, თუ ინსტრუქციაში წერია, რომ კონტაქტის დრო აქვს 5 წუთი, ეს ნიშნავს, რომ ჩვენ არ უნდა  გავაშროთ ზედაპირი 5 წუთის განმავლობაში. თუ ამ დროის განმავლობაში ზედაპირი გაშრება, საჭიროა ხსნარის ხელმეორედ გამოყენება, რომ შევინარჩუნოთ ზედაპირი ნესტიან მდგომარეობაში, სანამ კონტაქტის დრო არ ამოიწურება. რაც ნაკლებია კონტაქტის დრო, მით უფრო ნაკლებად გვიწევს პროცედურის გამეორება.

3. ზედაპირის თავსებადობა.

   გამოყენებამდე, ჩვენ უნდა დავრწმუნდეთ, რომ სადეზინფექციო საშუალება თავსებადია იმ ზედაპირთან, რომელზეც მას ვიყენებთ. ეს ინფორმაცია ასევე მითითებულია ეტიკეტზე.  წინააღმდეგ შემთხევვაში, შესაძლოა გამოვიწვიოთ რაიმე ზედაპირის უნებლიე დაზიანება.

4. სწორი დოზირება.

   სადეზინფექციო ხსნარის ხელით გაზავებისას, ხშირად გამოიყენებენ იმაზე მეტ კონცენტრატს, ვიდრე საჭიროა,  რაც მოლოდინს არ ამართლებს და უკეთესი შედეგის ნაცვლას, ზედაპირზე წებოვან ლაქებს ტოვებს. ნაკლები კონცენტრატის გაზავებისას კი, ხსნარმა შესაძლოა ვერ გაანადგუროს მავნე მიკრობები ზედაპირზე.  დარწმუნდით რომ გაზავება ხდება სწორად, ეტიკეტზე  მითითებული დოზირების ინსტრუქციის მიხედვით.

5. დამცავი ხელთათმანები.

   იმ შემთხვევაშიც კი, თუ SDS დოკუმენტში, პროდუქტს არ უწერია, რომ საჭიროა დამცავი ხელთათმანის გამოყენება, დაფიქრდით, იმ პოტენციურად ინფექციურ მასალაზე, რომელთანაც უნდა გქონდეთ კონტაქტი. ჩვენ თავი უნდა დაიცვათ იმისგანაც, რასაც ვწმენდთ. ამიტომ ზედაპირების დეზინფექციისას, აუცილებლად გამოიყენეთ დამცავი  ხელთათმანი. განსაკუთრებით იმ შემთხევაში, თუ გიწევთ დიდი მოცულობის და რაოდენობის ზედაპირების დასუფთავება.

 

პ.ს. დეზინფექციის დროს, განსაკუთრებული ყურადღება მიაქციეთ ხშირად შეხებად ზედაპირებს,როგორებიცაა: კარის სახელურები, ტელეფონები, მაგიდის ზედაპირები... ისინი ძირითად როლს თამაშობენ ინფექციის გადაცემაში, ამიტომ რეკომენდებულია მათი დეზინფექცია დღეში რამდენჯერმე.